ДУШАНБЕ, 12 авг – Sputnik. Дар шаҳри Душанбе беш аз 1 тонна маводи нашъадор бо роҳи сӯзонидан, нест карда шуд, хабар медиҳад ВКД.
Дар доираи барномаи вижаи нобудкунӣ, аз ҷумла, 34 кг 390 гр героин, 214 кг 563 гр афюн, 605 кг 483 гр бангдона, 272 кг 504 гр ҳашиш ва дигар намуди моддаҳои нашъадор сӯзонида нест карда шуданд.
Дар баробари ин, дар чорабинии мазкур ҳабҳои нашъадори синтетикӣ низ маҳв карда шуданд.
"216гр, “Амфетамин”, 1 кг 971 “Метамфитамин”, 1кг 946 гр “Метадон”, 1кг 127 гр “Алпразолам” тариқи сӯзонидан нест карда шуданд", - омадааст дар хабарнома.
ВКД мегӯяд, маводи нашъадори сӯзонидашуда, он далелҳои шайъие буданд, ки аз гурӯҳҳои нашъаҷаллоб мусодира гардидаву нисбаташон ҳукми суд содир гардидааст.
Ин ниҳод афзуда, ки солҳои охир милитсия муборизаро алайҳи роҳҳои муосири истифодаи маводи мухаддир пурзӯр намуда, аз муомилоти ғайриқонунӣ ҳазорҳо дона ҳабҳои нашъадори синтетикӣ, ки истеъмоли он ба ҳаёту саломатии одамон таҳдид мекунад, дарёфт ва мусодира менамоянд.