ДУШАНБЕ, 12 авг – Sputnik. Дар Тоҷикистон беш аз 1,5 миллион нафарро бар зидди коронавирус эм кардаанд, хабар медиҳад хадамоти матбуотии Вазорати тандурустии Тоҷикистон.
Тибқи гузориши ин ниҳод, то 11 август 1 миллиону 541 ҳазору 475 нафар бар зидди COVID-19 эм карда шудаанд.
"Ҷузъи дуввуми ваксинаро то санаи зикргардида беш аз 130 ҳазор нафар гирифтанд", - гуфтанд дар Вазорати тандурустӣ.
Танҳо рӯзи 11 август дар Тоҷикистон 60 ҳазору 823 нафар эм карда шуданд.
Қобили зикр аст, ки тибқи қарори ситоди ҷумҳуриявӣ оид ба муқобила бо паҳншавии COVID-19 аз 3 июл, эмкунии зидди коронавирус барои шахсони аз 18 сола боло ҳатмӣ мебошад.
Вазорати тандурустӣ аз шаҳрвандоне, ки ваксина нагирифтаанд, даъват мекунад, ки барои эм шудан ба пизишкони оилавӣ ё марказҳои саломатӣ (поликлиникаҳо) -и маҳалли зисташон муроҷиат кунанд.
Ҳоло ба Тоҷикистон дар маҷмӯъ 4 миллион вояи ваксинаҳои AstraZeneca, CoronaVac ва Moderna ворид шудааст.
Дар ояндаи наздик интиқоли ваксинаи сохти русии Sputnik V дар назар аст.