ДУШАНБЕ, 22 июл — Sputnik. Ориф Хоҷазода, Раиси Кумитаи давлатии идораи замин зимни нишасти матбуотӣ қайд кард, ки, Тоҷикистону Ӯзбекистон 1326 километр марз доранд ва аз он 1319 километраш пурра муайян шудааст.
Ба гуфтаи вай хатти марзи боқимонда, қисматҳое дорад, ки Тоҷикистону Ӯзбекистон ва Қирғизистонро бо ҳам мепайвандад.
“Нисбат ба ин масъала аз 1 то 3-уми май дар Фарғона вохӯрӣ гузашт. Се кишвар пешниҳодҳои худро барои омӯзиш пешниҳод карданд. Барои ҳамин, агар ин нуқтаҳо муайян шаванд, ба пуррагӣ хатти сарҳад бо Ӯзбекистон муайян хоҳад шуд”, - таъкид дошт Кумитаи идораи замини Тоҷикистон.
Ориф Хоҷазода, ҳамчунин гуфт, ки дар минтақаи обанбори “Фарҳод” як минтақаи хурде боқӣ мондааст, ки делимитатсия нашудааст.
“Нисбат ба истифодабарӣ обанбори “Фарҳод” байни ду давлат шартнома вуҷуд дорад ва ягон баҳс дар миён нест”, - гуфт вай.
Ӯзбекистон баъд аз ба сари қудрат омадани Шавкат Мирзиёв ва сафари расмии ӯ ба Тоҷикистон дар моҳи марти соли 2018, равобит миёни ду кишвар беҳбуд шуд ва дар масъалаи аломатгузории марз низ ба созиш расиданд.
Аз ҷумла, бар асоси ин созиш ду кишвари ҳамсоя аҳд карданд, обанбори “Фарҳод”-ро барои як муддати тӯлонӣ якҷоя истифода баранд.