ДУШАНБЕ, 12 июл — Sputnik. Дар Тоҷикистон боз як зани маъруф, ки солҳои зиёд тоҷикистониён симои ӯро аз телевизион тамошо мекарданд ва мардумро бо муҳимтарин хабару гузоришҳо шинос мекард, ҷон ба Ҳақ супорид.
Ин зан, Мунаввара Усмонова аст ва ӯ низ қурбони бемории коронавирус гардид.
Хабари даргузашти Усмоноваро, рӯзноманигор Шаҳло Наҷмиддинова аз қавли Малоҳат Дӯстматова дар сафҳаи Facebook -ии худ нашр намудааст.
"Дар қатори ин шабурӯз рафтагон, наттоқи варзидаи Телевизиони Тоҷикистон, тарҷумон ва коргардони филмҳои ҳуҷҷатӣ Мунаввара Усмонова ҳам аз бемории ковид бандагӣ кард", - навиштааст, Малоҳат Дустматова ва Наҷмиддинова ин навиштаро бознашр намудааст.
Мунаввара Усмонова 71 сол дошта, тақрибан ду ҳафта қабл дар бемористони "Якум Советский" бо нишонаҳои бемории коронавирус бистарӣ буд.
Аммо пизишкон натавонистанд ҷони Усмоноваро наҷот диҳанд ва ӯ рӯзи 12 июн ҷон ба Ҷонофарин супорид.
Ёдовар мешавем, ки имрӯз Ҳунарманди мардумии Тоҷикистон, Шералӣ Абдулқайсов низ дар синни 70 - солагӣ даргузашт.
Иллати марги ин ҳунарманди хушном ҳам бемории коронавирус гуфта мешавад. Абдулқайсов чанд рӯз боз дар Бемористони Қарияи Боло бистарӣ буд ва пас аз вазнин шудани аҳволаш ӯро ба шӯъбаи эҳёгарӣ интиқол доданд. Имрӯз бошад, Абдулқайсов даргузашт.