ДУШАНБЕ, 9 июл - Sputnik. Сардори Ситоди муштараки СААД, генерал – полковник Анатолий Сидоров дар якҷоягӣ бо гурӯҳи фаврӣ аз марзи Тоҷикистону Афғонистон дидан кард, хабар медиҳад хадамоти матбуотии созмон.
Аз ҷумла, ӯ аз болои минтақаи сарҳадӣ парвоз карда, аз қисми 9-уми сарҳадӣ дар Қалъаи Хумб боздид намуд.
"Гурӯҳи афсарон дар маҳал бо тартиби ҳифзи сарҳади Тоҷикистону Афғонистон аз ҷониби хизматчиёни ҳарбии Қӯшунҳои сарҳадӣ ва таъминоти ҳайати шахсӣ бо аслиҳа ва техникаи махсус шинос шуданд", - гуфт хадамоти матбуот.
Ғайр аз ин, як гурӯҳи фаврӣ таҳти роҳбарии Сидоров минтақаи марзиро аз назар гузаронд, ки тавассути он беш аз 200 сарбози афғон ба Тоҷикистон ақибнишинӣ карданд.
Қайд карда мешавад, ки сардори Ситоди муштараки СААД ба дараҷаи омодагии ҷузъу томҳои нерӯҳои марзбонии Тоҷикистон барои таъмини амният дар марз баҳои баланд дод.
Боздид аз минтақаи наздимарзӣ мусоидат мекунад, ки пешниҳодҳои воқеӣ барои коҳиши ташаннуҷ дар минтақа ва омода кардани чораҳо дар доираи СААД амалӣ карда шаванд.