ДУШАНБЕ, 7 июл – Sputnik. Теъдоди фавтидагон аз коронавирус дар Тоҷикистон афзоиш меёбад: вазорат таъйид кард, ки дар як шабонарӯзи ахир дар кишвар 2 тани дигар аз COVID-19 фавтиданд.
Ҳамин тавр, бино бар иттилои расмӣ, шумораи қурбониёни коронавирус дар Тоҷикистон дар мавҷи дувум 7 нафарро ташкил дода, дар умум 97 ҳолати фавт сабт шудааст.
Аммо тибқи иттилои расонаҳо ва шабакаҳои иҷтимоӣ, дар мавҷи дувуми коронавирус, аз 21 июн то имрӯз, 7 июл - ҳудуди 20 тан дар пайи гирифторӣ ба вируси корона ҷон додаанд.
Шумораи гирифторӣ низ рекорди нав гузоштааст, ки дар мавҷи дувум бесобиқа аст.
Тибқи иттилои вазорат, як шабонарӯзи ахир дар Тоҷикистон 35 ҳолати бемори нави коронавирус ошкор шуда, шумораи умумии сироятёфтагон ба 13 690 нафар расидааст.
Шумораи шифоёфтагон дар шабонарӯзи ахир, 27 касро ташкил дода, дар умум аз ин вабои аср 13 437 кас халос шудаанд.
Ёдрас мешавем, имрӯз манобеи Sputnik Тоҷикистон аз даргузашти академик Карим Ҳайдар, асосгузори мактаби фармакологҳо дар соҳаи синтези химиявӣ ва пайвастҳои табиӣ дар Душанбе ва подполковник Маъруф Ҳабибов дар Панҷакент дар пайи бемории коронавирус хабар доданд.
Шоми 6 июл аз даргузашти собиқ корманди телевизиони Тоҷикистон ва муовини мудири нашриёти "Адиб" Ҳабиба Қурбонова аз бемории монанд ба коронавирус хабар дода шуд.
Имрӯз шабакаҳои иҷтимоӣ аз даргузашти табиби машҳури дигар Хуршед Саидов, номзади илмҳои тиб аз коронавирус хабар доданд.