Дар навори нашргардида таъкид шудааст, ки субҳи имрӯз зиёда аз 400 нафар паноҳандагони дигари афғон ба қаламрави Тоҷикистон роҳ дода шуданд. Дар маҷмуъ мақомоти ВМКБ теъдоди фирориёнро беш аз 1000 нафар арзёбӣ карданд, ки миёнашон дар баробари низомиён инчунин занону кӯдакон низ ҳастанд.
Дар гузориши мақомот таъкид шудааст, ки тайи се рӯз фирориён дар маҳаллаи Теми шаҳри Хоруғ нигоҳдорӣ шуда, баъдан ба ҷои амни дигар интиқол ёфтанд.
Абдумуталиб Валади Азиз, яке аз фирориён мегӯяд, дар ҳоле ба Тоҷикистон гурехт, ки аъзои Толибон* дар масофаи чандметрӣ қарор доштанд. Ӯ гуфт, тоҷикистониён аз гурезаҳо бо чеҳраи боз истиқбол карданду ҷой доданд.
Дар миёни онҳое, ки фирориёнро пешвоз гирифтанд, раиси шаҳри Хоруғ, Алишер Мирзонабот ва дигар шахсони расмӣ қарор дошанд.
Ахиран Ёдгор Файзов, раиси ВМКБ бо намояндагони СММ ва Бунёди Оқохон масъалаи фирориён аз Афғонистонро баррасӣ кард. Намояндагони созмонҳои байналмилалӣ ваъда доданд, ки ба Тоҷикистон дар мавриди ҳалли мушкилоти марбут ба фирориён кумак хоҳанд кард.
*созмони мамнӯъ дар Тоҷикистону Русия