ДУШАНБЕ, 5 июл — Sputnik. Эмомалӣ Раҳмон бо имзои қарори Ҳукумат, Абдуллозода Нурулло Ҳомидро аз вазифаи муовини фармондеҳи Қӯшунҳои сарҳадии Кумитаи давлатии амнияти миллии Тоҷикистон озод кард.
Абдуллозода дар ин мақом корҳои бахши разведкаро роҳбарӣ мекард. Далели барканорияш дар қарори Ҳукумат гузаштан ба кори дигар арзёбӣ шудааст, аммо феълан мақоми нави ӯ маълум нест.
Инчунин маълум нест, ки ноиби нави фармондеҳи нерӯҳои марзбонӣ дар бахши разведка ё иктишоф кӣ таъйин шудааст ё мешавад.
Ин тағйирот дар ҳолест, ки вазъи марзи Тоҷикистону Афғонистон ҳафтаҳои охир шиддат гирифта, аъзои созмони мамнӯи Толибон* бисёре аз навоҳии ҳаммарз бо Тоҷикистонро ғасб намудаанд.
Раисиҷумҳури Тоҷикистон дар ҷаласаи Шӯрои амниятӣ ба вазифи мудофиа дастур дод, ки барои таҳкими ҳифзи сарҳадот ҳудуди 20 ҳазор низомии эҳтиётиро ба марз бо Афғонистон сафарбар намояд.
Дар ҳамин ҳол Толибон* изҳор доштаанд, ки марзи Тоҷикистонро нахоҳанд шикасту бо ин кишвари дӯст муносиботи хуб хоҳанд дошт.
*созмони мамнӯъ дар Тоҷикистон, Русия ва бархе кишварҳои дигар