ДУШАНБЕ, 24 июн — Sputnik. Ба сокинон ва меҳмонони шаҳри Хуҷанд даҳ ҳазор ниқоби тиббӣ тақсим карданд.
Ин амал дар назди бозори "Панҷшанбе" аз ҷониби кормандони Маркази ташаккули тарзи ҳаёти солими вилоят ва Маркази назорати давлатии санитарии Хуҷанд амалӣ шудааст, хабар медиҳад мақомоти вилояти Суғд.
Гуфта мешавад, ки ҳадаф аз ташкили чунин корҳои фаҳмондадиҳӣ, пешгирӣ аз паҳншавии бемории Covid-19 аст.
Манбаъ омили хуруҷи дубораи вируси коронаро дар Тоҷикистон, бетаваҷҷуҳӣ, риоя накардани карантин аз ҷониби шаҳрвандони аз хориҷ баргашта ва истифода накардани ниқоб мегӯяд.
"Дар рафти амалиёти гузаронидашуда дар маконҳои серодам, аз ҷумла марказҳои тиҷоратӣ, бозорҳо, бахусус бозори марказии "Панҷшанбе" аз ҷониби гуруҳи корӣ ба садҳо нафар ашхоси бениқоб ниқобҳои муҳофизатӣ ройгон дасрас карда шуданд"., - омадааст дар хабарнома.
Зимни суҳбат ба мардум тавсия дода шудааст, ки дар марказҳои саломатии ҳудуди зист эмгузаронӣ намоянд, то аз хатари беморӣ дар канор бошанд.
Бояд гуфт, бино ба иттилои раиси вилояти Суғд, дар вилоят дар ҳоли ҳозир 8 нафар маризи вируси корона ҳаст ва 37 каси дигар бемории илтиҳоби шуш дорад.
Дар маҷмуъ, дар давоми се рӯз дар Тоҷикистон шумораи мубталоёни вируси корона ба 50 нафар расид.