ДУШАНБЕ, 21 июн – Sputnik. Тоҷикистон 300 ҳазор воя ваксин алайҳи марзии коронавирусро дарёфт кард, хабар медиҳад агентии Ховар.
Ба иттилои манбаъ, ин миқдор ваксин дар доираи созишнома миёни Тоҷикистону Чин дастрас гардид.
Ваксини воридгардида "CoronaVaс" буда, бо он доираи муайяни аҳолии Тоҷикистон эм хоҳанд шуд.
Манбаъ меафзояд, дар маросими қабули ваксин, муовини сарвазир Матлубахон Сатториён, Вазири тандурустӣ Ҷамолиддин Абдуллозода, муовини Вазири корҳои хориҷӣ Фарҳод Салимӣ, сафири Чин дар Тоҷикистон Лу Бин иштирок намуданд.
Илова бар ин, муовини мудири ҶДММ "Ширкати кӯҳӣ-саноатии Тоҷикистону Хитой " Анвар Зиёев низ ширкат варзид.
Ҷамолиддин Абдуллозода аснои қабули ваксин изҳор дошт, ки ин намуд ваксин бо ташаббуси Ҳукуматҳои Тоҷикистону Чин ва ҳамзамон бо дастгирии ҶДММ "Ширкати кӯҳӣ-саноатии Тоҷикистону Хитой" дастрас намуд.
Вазир аз ҷумла зикр кард, ки ҷониби Чин ба Тоҷикистон 300 ҳазор воя ваксини "CoronaVaс" -и" Sinovac Research & DevelopmentCo. Ltd"- и Ҷумҳурии Халқии Хитой ва 300 800 адад сузандору ворид намуд.
Маврид ба зикр аст, ки ваксинаи мазкур дар анборҳои махсуси Вазорати тандурустӣ нигаҳдорӣ шуда, тибқи нақшаи миллӣ ба табақаҳои пешбинишудаи аҳолӣ марҳила ба марҳила гузаронида мешавад.