ДУШАНБЕ, 21 июн - Sputnik. Тоҷикистон барои гирифтани ваксинаи Русия омодагӣ мегирад, гуфт Наврӯз Ҷаъфаров, сардори Раёсати амнияти санитарию эпидемиологӣ, ҳолатҳои фавқулодда ва ёрии таъҷилии Вазорати тандурустӣ ва ҳифзи иҷтимоии аҳолии ҷумҳурӣ.
Ҷаъфаров дар суҳбат бо "Интерфакс" изҳор доштааст, ки таъминоти ваксинаи Sputnik V дар ҳамаи сатҳҳо ҳамоҳанг шудааст. Аз ҷумла дар сатҳи сарони давлатҳо, сарвазирон ва вазирони тандурустии ду кишвар.
Ин мақомдори тандурустӣ дар Тоҷикистон илова намуд, ки Сарраёсати назорати фармакологии Хадамоти назорати давлатии тандурустӣ ва ҳифзи иҷтимоии аҳолии Тоҷикистон тамоми корҳои омодагиро барои сабти номи ваксинаҳои Русия анҷом додааст.
Эпидемиологи тоҷик тавзеҳ дод, ки барои ворид кардани ваксина ба кишвар танҳо як қадам боқӣ мондааст:
Ҳукумати Русия бояд дастури расмӣ ба Вазорати саноат дар мавриди ҷудо кардани квотаи муайяни ваксинаҳоро барои Тоҷикистон қабул кунад.
Интизор меравад, ки Русия ба Тоҷикистон 100 000 дона ваксинаи Sputnik V-ро ройгон диҳад.