ДУШАНБЕ, 17 июн — Sputnik. Вазорати беҳдошти Тоҷикистон вуҷуди вируси корона дар кишварро рад кард ва овозаҳо дар бораи паҳн шудани ин сироятро бепоя хонд.
"Овозаҳо дар бораи гӯё хурӯҷ кардани бемории COVID-19 дар Тоҷикистон, ки чанд рӯзи охир дар баъзе аз шабакаҳои иҷтимоӣ паҳн мешаванд, асоси воқеӣ надоранд. Аз аввали сол то имрӯз дар Тоҷикистон ягон ҳолати нави COVID-19 ба қайд гирифта нашудааст",-гуфт сухангӯи Вазорат Эмомалӣ Мирзоев дар суҳбат бо АМИТ "Ховар".
Сухангӯи вазорат хурӯҷи бемории пневмонияро дар кишвар ба гармшавии боду ҳаво рабт дод. Воқеан рӯзҳои охир гармии тоқатфарсо бархе аз манотиқи Тоҷикистонро фаро гирифтааст.
"Мардум бештар ба истеъмоли яхмос ва обҳои хунук рӯ оварданд, ки ин амал боиси ба илтиҳоби шуш гирифтор шудани онҳо гардид. Вале ин маънои онро надорад, ки ин беморон гирифторони бемории COVID-19 ҳастанд", - афзуд Мирзоев.
Бино ба иттилои номбурда, феълан бемории илтиҳоби шуш бештар дар кӯдакон ва калонсолон ба қайд гирифта шудааст ва аксари онҳо аллакай бемории ковидро аз сар гузаронидаанд.
"Аксарияти онҳо касоне ҳастанд, ки соли гузашта, ҳангоми хурӯҷи каронавирус бемориро аз сар гузаронидаанд ва шуши онҳо пурра барқарор нашудааст. Барои пурра барқарор шудани шуш онҳо бояд зери назорати духтурон қарор гирифта, тавсияҳои онҳоро пурра риоя намоянд ва аз нӯшидани нӯшобаҳои сард ва истеъмоли яхмос даст кашанд", — таъкид кард Эмомалӣ Мирзоев.
Сухангӯи Вазорат гуфт, ки муассисахои кумаки аввалияи тиббию санитарӣ аз 3 то 10 нафарро бо нишонаҳои баландшавии ҳарорати бадан, сулфа, набудани иштиҳо ва беҳолӣ, ки аз аломатҳои асосии илтиҳоби шуш ва COVID-19 маҳсуб мешаванд, барои ташхиси COVID-19 пешниҳод мекунанд, вале хушбахтона ҳамаи он ташхисҳо манфӣ мебароянд.
Аммо ба гуфти Мирзоев хурӯҷи беморӣ дар аксари кишварҳои ҷаҳон, Вазоратро нигарон кардааст.
"Мо ҳеҷ гоҳ гуфта наметавонем, ки Тоҷикистон орӣ аз каронавирус мемонад", - гуфт ӯ.
Вазорати тандурустӣ аз шаҳрвандон даъват карда, ки қоидаҳои гигиениро риоя намуда, дар ҷойҳои ҷамъиятӣ аз ниқобҳои тиббӣ истифода баранд.