ДУШАНБЕ, 16 июн - Sputnik. Манучеҳр Ҷалилов, ҳамлагари бошгоҳи “Истиқлол” бо 19 гол дар сархати даҳгонаи беҳтарин голзанҳо дар таърихи тими миллии Тоҷикистон қарор гирифт.
Дар марҳилаи интихобии Ҷоми Ҷаҳон – 2022 дар зӯрозмоӣ бо тими Мянмар, Манучеҳр Ҷалилов дар дақиқаи 53-юми бозӣ голро вориди дарвозаи ҳариф кард. Барои Ҷалилов ин 19-умин гол дар ҳайати тими миллии Тоҷикистон шуд.
Ӯ дар ҳайати тими мунтахаби футболбозони Тоҷикистон аз соли 2015 бозӣ карда, дар 38 бозӣ ҳунарнамоӣ кардааст.
Дар баробари Ҷалилов ба даҳгонаи беҳтарин голзанҳо дар таърихи тими миллӣ Юсуф Рабиев бо 15 гол, Нумонҷон Ҳакимов бо 14 гол, Тоҳирҷон Муминов бо 10 гол ворид шудаанд.
Дар ин феҳраст инчунин Фатҳулло Фатҳуллоев ва Иброҳим Рабимов бо 9 – голӣ, Давронҷон Эргашев, Нуриддин Давронов, Ҷомихон Муҳиддинов – ҳама 8 голӣ ва Дилшод Восиев бо 7 гол ҷой гирифтаанд.