ДУШАНБЕ, 5 июн - Sputnik. Бонки миллии Тоҷикистон эълон кардааст, ки ба ширкати “СИ ЭЙЧ ЭЛ ИНТЕРНЕШНЛ” барои анҷомдиҳии хизматрасонии (фаъолияти) махсус бо асъори хориҷӣ ба муҳлати 3 сол иҷозатнома дод.
Манбаъ қайд кардааст, ки қарори мазкур аз сӯи раёсати Бонки миллии Тоҷикистон 1 июни соли 2021 ба имзо расидааст.
“Мутобиқи Қонуни Тоҷикистон “Дар бораи Бонки миллии Тоҷикистон” ва Қонуни Тоҷикистон “Дар бораи танзими асъор ва назорати асъор” Раёсати Бонки миллӣ бо қарори навбатии худ аз 1 июни соли 2021, таҳти №101 ба Ҷамъияти саҳомии пӯшидаи “СИ ЭЙЧ ЭЛ ИНТЕРНЕШНЛ” барои анҷомдиҳии хизматрасонии (фаъолияти) махсус бо асъори хориҷӣ ба муҳлати 3 сол иҷозатнома дод”, - таъкид доштааст манбаъ.
Бонки миллӣ қайд кардааст, ки департаменти идораи захираҳои байналмилалӣ ва сиёсати қурби асъор вазифадор карда шуд, ки дар Феҳристи дорандагони иҷозатнома барои анҷомдиҳии хизматрасонии (фаъолияти) махсус бо асъори хориҷӣ сабти дахлдорро ворид намояд.