ДУШАНБЕ, 11 май – Sputnik. Баҳоваддин Баҳодурзода, раиси Исфара, шаҳри наздисарҳадӣ бо Қирғизистон аз бемористон мураххас шуда, сари кор баргашт, хабар дод Зубайдулло Шомадов, сухангӯи ҳукумати маҳаллӣ ба Sputnik Тоҷикистон.
“Субҳи имрӯз дар ҳукумат ҷаласа доир намуда, ба масъулони шуъбаҳо дастуру супоришҳо доданд. Қарор аст, худашон имрӯз барои аёдати беморон ба бемористон раванд”, - афзуд Шомадов.
Баҳодурзода яке даҳҳо захмии муноқишаи марзии охир бо Қирғизистон мебошад, ки ба гуфтаи худаш замони барои музокирот рафтанаш ба марз, тир хӯрд.
Ӯ шоми 29 апрел дар пайи шиддат гирифтани муноқишаи мусаллаҳонаи марзӣ бо қирғизҳо аз китфаш маҷруҳ шуд. Рӯзи 1 май табибон дар Бемористони клиникавии № 1-и Хуҷанд ба гирифтани тир аз бадани ӯ муваффақ шуданд. Низоъ дар марзи Тоҷикистон ва Қирғизистон шоми 28 апрел аз сангзанӣ сар шуда, ба тирпарронӣ табдил ёфт.
Мақомоти Тоҷикистон гуфтаанд, ки низоъ аз сӯи қирғизҳо шурӯъ шуд, вале мақомоти Қирғизистон айни чунин иддаоро пеш оварда, гуфтаанд, ки тоҷикон муноқишаро сар кардаанд.
Теъдоди қурбониён аз ҳар ду тараф беш аз 55 нафарро ташкил медиҳад. Мақомоти Тоҷикистон гуфтанд, ки дар пайи муноқишаи мусаллаҳонаи марзӣ 87 тан захмӣ шуда, 19 нафар ба шаҳодат расидаанд. Қирғизистон аз ҳалокати 36 шаҳрвандаш дар ин даргирӣ хабар дод.
Феълан вазъ дар марз муътадил арзёбӣ гардида, 2 май ҳайатҳои Тоҷикистон ва Қирғизистон протоколи муштарак дар бораи делимитатсия ва демаркатсияи сарҳадро ба имзо расонданд.
Тоҷикистону Қирғизистон ҳудуди 970 километр марзи муштарак доранд, ки аз ин то ҳол ҳудуди 520 километраш аломатгузорӣ шуда, боқимонда ҳанӯз ҳам номуайян мебошад.