ДУШАНБЕ, 29 апр — Sputnik. Баҳоваддин Баҳодурзода, шаҳрдори Исфара дар пайи рухдоди муноқишаи дар марз захмӣ шудааст.
Ин ҳодисаро ба Sputnik Тоҷикистон бародараш Фирдавс Тӯрахонов, ки сартабиби Бемористони шаҳри № 1 и Хуҷанд таъйид кард.
Бино ба иттилои манбаъ, раиси шаҳр ҳангоми қарор доштанаш дар қишлоқи Хоҷа Аълои Исфара, дар наздикии нуқтаи обтақсимкунии "Головной" ё “Плотина” ғайриинтизор аз тахтапушташ тир хӯрдааст.
Манбаъ мегӯяд, захмаш чандон ҷиддӣ набуда, хушбахтона сабук аст. Аммо, ба гуфтаи вай, бино бар ноором будани вазъ, Баҳодурзода ҳоло дар худи Хоҷа Аъло қарор дорад.
Феълан ҳайати ҳамроҳонаш кӯшиш карда истодаанд, ки барои тадовии захмаш ӯро ба маркази ҷамоати деҳоти Чоркӯҳ ва ё ба Бемористони марказии шаҳри Исфара расонанд.