ДУШАНБЕ, 27 апр - Sputnik. Пас аз ҷаласаи Шӯрои вазирони дифоъ, дабири кулли СААД Станислав Зас гуфт, ки мавзӯи асосии муколама чолишҳо ва таҳдидҳо ба амнияти низомии кишварҳои узви СААД ва чораҳои бартарафсозии онҳо мебошад.
Ғайр аз он, фазои сиёсӣ дар қаламрави масъулияти созмон - дар минтақаҳои Аврупои Шарқӣ, Қафқоз ва Осиёи Марказӣ баррасӣ карда шуд.
"Агар мо вазъро дар маҷмӯъ тавсиф кунем, ин хеле печида ва ноустувор аст. Мо афзоиши равандҳои манфиро дар соҳаи таъмини амнияти низомӣ ҳам дар сатҳи ҷаҳонӣ ва ҳам минтақавӣ қайд мекунем", - гуфт Зас.
Дабири кулли СААД афзуд, ки дар минтақаи Осиёи Марказӣ амнияти дастаҷамъӣ бештар ба вазъи кишвари ҳамсоя - Афғонистон вобаста аст, ки дар он ҷо фаъолияти созмонҳои байналмилалии террористӣ афзоиш ёфтааст ва таваҷҷӯҳи Толибон* ба манотиқи шимолии кишвар афзоиш меёбад.
“Қочоқи маводи нашъаовар тариқи қаламрави таҳти идораи Толибон барои давлатҳои узви Созмони аҳдномаи амнияти дастаҷамъӣ мояи нигаронист, чун интиқоли маводи мухаддир аз сарчашмаҳои асосии маблағгузории ифротгароён мебошад", - изҳор дошт Зас.
Барои танзими вазъ дар қаламрави таҳти назорати созмон ва марзҳои он як қатор чораҳо андешида шуданд. Аз ҷумла, Шӯрои вазирони дифоъи СААД муҳимтарин санад - Нақшаи муҷаҳҳаз кардани нерӯҳои дастаҷамъии вокуниши сареъро бо аслиҳаи муосир, таҷҳизоти ҳарбӣ ва махсус ва воситаҳои махсус тасдиқ кард.
Амалисозии ин нақша ба баланд бардоштани сатҳи таҷҳизоти техникии ҷузъҳои нерӯҳои СААД нигаронида шудааст.