ДУШАНБЕ, 20 апр - Sputnik. Бино ба иттилои дафтари матбуоти Вазорати корҳои дохилаи Тоҷикистон, ҳодиса санаи 18-уми апрели соли равон дар ҷамоати деҳоти Хистеварзи ноҳияи Б.Ғафуров рух додааст.
Тибқи иттилои манбаъ, марди 32-солаи сокини ҷамоати деҳоти Хистеварзи ноҳияи Б.Ғафуров, дар ҳудуди ҷамоати деҳоти мазкур дар дохили автомашинаи шахсиаш тамғаи “Опел-Зафира”, бо ҷавони 18-солаи сокини ҳамин ҷамоат ҷангу ҷанҷол намуда, бо корди хоҷагӣ ба қисми рони пойи чапаш 1-маротиба задааст.
Гуфта шудааст, ки сипас, ҷавони 18-сола ба марди 32-сола дарафтода, бо истифодаи зӯроварӣ кордро аз дасти ӯ кашида гирифта, 12-маротиба ба аъзои баданаш задааст.
“Дар натиҷа, номбурда ҷароҳати вазнини ҷисмонӣ бардошта дар беморхона бистарӣ гардидааст”, - таъкид даоштааст ВКД тоҷикистон.
Манбаъ қайд кардааст, ки дар натиҷаи гузаронидани чорабиниҳои оперативӣ ҷустуҷӯӣ аз ҷониби кормандони милитсия ҷавони номбурда дастгир гардид.
Дар ҳоли ҳозир оид ба ин ҳодиса парвандаи ҷинояти бо моддаи 32 қисми 3 ва 104 қисми 1 Кодекси ҷиноятии Тоҷикистон оғоз карда шуда, тафтишот идома дорад.