ДУШАНБЕ, 30 мар — Sputnik. Ҳунарманди шинохтаи театри "Аҳорун" Аҳлиддин Шарипов даргузашт, хабар додааст Вазорати фарҳанги Тоҷикистон.
Ба гуфтаи наздикони марҳум, Аҳлиддин Шарипов, ки 60-сола буд, бар асари фишорбаландӣ вафот кардааст.
Маросими ҷанозаи ҳунарманд, баъди намози пешини имрӯз, 30 март дар масҷиди воқеъ дар маҳаллаи киллометри нуҳуми шаҳри Душанбе баргузор шуд.
Аз театри "Аҳорун" ба "Азия-Плюс" гуфтанд, ки ӯ дирӯз то бегоҳ дар кор буд ва субҳи имрӯз наздиконаш занг задаву гуфтанд, ки бар асари фишорбаландӣ даргузашт.
Сабоҳат Қосимова, мудири театри "Аҳорун" гуфт, ки ҳунари Аҳлиддин Шарипов худодод буд.
"Ӯ одами зиндадил ва якрӯй буд. Аҳлиддин аз одамҳои дурӯя набуд. Нақши Аҳлиддин дар театр ғайриодӣ буд, нақше, ки танҳо ӯ бозӣ карда метавонист", - изҳор доштааст бо таассуф Сабоҳат Қосимова.
Ба гуфтаи Сабоҳат Қосимова ӯ аз рӯзҳои нахустини таъсиси театри "Аҳорун" то поёни умр бо ин театр буд.
Аҳлиддин Шарипов бештар аз 40 соли умри худро дар театр гузарондааст. Ӯ дар намоишҳои "Юсуфи гумгашта боз ояд" "Хари Даҷҷол" ва намоишҳои Фаррух Қоим нақшҳои мондагоре офарида буд. Ҳамчунин яке аз ёрони бунёдгузори театри "Аҳорун" коргардон ва ҳунарманди пуровоза Фаррух Қосим буд.