ДУШАНБЕ, 26 мар – Sputnik. Субҳи рӯзи гузашта дар роҳи мошингарди Душанбе - Варзоб садамаи нақлиётӣ рух дод, хабар медиҳад Кумитаи ҳолатҳои фавқулодаи Тоҷикистон.
Ба иттилои манбаъ, садама соати 08: 35 дақиқа дар километри 71 - уми роҳи мошингарди Душанбе - Варзоб рух додааст.
Гуфта мешавад, мошини боркаши тамғаи "Mercedes Sprinter" бо мошини сабукрави "Opel Zafira" бархӯрдааст, ки дар дохили автомашинаи охирон ронанда бо 5 донишҷӯ қарор дошт.
Манбаъ меафзояд, ба кӯмаки донишҷӯёни дармонда дар автомашина, гурӯҳи наҷотбахшон, ки ба таври шабонарӯзи дар ин шоҳроҳ навбатдорӣ мекунанд, шитофтанд.
"Нахуст ронанда ва баъдан ҳар 5 донишҷӯ аз автомашина берун оварда шуданд", - таъкид мешавад дар хабар.
Зикр мегардад, ки дар ин ҳодисаи нохуш, хушбахтона талафотӣ ҷонӣ рух надод. Ронанда ва мусофирониӯ ҷароҳатҳои сабук бардоштанд.
Дар ҳамин ҳол, КҲФ аз ронандагон хоҳиш намудааст, ки ҳангоми ҳаракат дар роҳҳои кӯҳӣ фосилаи байни мошинҳо ва ҳамзамон суръатро нигоҳ доранд.