ДУШАНБЕ, 14 мар — Sputnik. Мутахассисони Раёсати назорати санитарию эпидемиологии Алмаато бори дигар аз сокинон даъват мекунанд, ки робитаро маҳдуд кунанд ва чораҳои бехатарии санитариро қатъӣ риоя кунанд.
“Дар сурати риоя нашудани ин тавсияҳо ва афзоиш ёфтани тамоси мардум, эҳтимол боз мавҷи нави паҳншавии коронаиврус сурат гирад”, - ҳушдор медиҳанд намояндагони раёсат.
Зимнан, таъкид гардид, ки дар сурати зиёд шудани теъдоди маризони коронавирус, ҳукумат боз маҳдудиятҳои шадидро ҷорӣ мекунад.
Вазъи эпидемиологии коронавирус дар Алмаато аз 2 март печидатар шуд ва аз 10 март пойтахти Қазоқистон боз ба минтақаи “сурх” шомил гардид.
Афзоиши беморӣ 3 март оғоз шуд, ки дар як рӯз 121 ҳолат ба қайд гирифта мешуд.
Ситоди фаврӣ оид ба коронавирус дар 24 соати ахир аз сабт шудани 360 ҳолати нави гирифторшавӣ ба вирус хабар медиҳад, ки аз ин миён 359 ҳолат маҳаллӣ буда, танҳо як ҳолат аз Туркия оварда шудааст.
Дар ҳамин ҳол, дар беморхонаҳои Алмаато феълан 1287 нафар (57 кӯдак) бистарӣ ҳастанд.
Якбора афзоиш ёфтани мавориди нави сироятшавии одамон ба коронаиврус ба зиёд шудани робитаҳои иҷтимоии шаҳрҳо, ҷоннок шудани муҳоҷирати меҳнатӣ, бештар шудани занҷираи интиқоли сироят аз як оила ба шахсони солим дар дохили нақлиёт ва ҷойҳои ҷамъиятӣ рабт дода мешавад.
Аз оғози эпидемия дар Алмаато 27.361 ҳолати сирояти коронавирус ошкор карда шудааст. Ҳамин тариқ, Алмаато аз лиҳози шумораи сироятёфтагон пешсаф аст.