ДУШАНБЕ, 9 фев – Sputnik. Маълум шуд, дар шаҳри Хуҷанд чанд кас аз вируси корона сироят ёфтаву фавтидаанд.
Маъруф Ҳоҷибоев, муовини сардори Раёсати тандурустии Суғд, ки имрӯз дар нишасти матбуотии ҳукумати Хуҷанд ба саволи рӯзноманигорон омори COVID -19 ро шарҳ дод.
Бино ба иттилои Ҳоҷибоев, дар шаҳри Хуҷанд 1547 мавриди гирифтории сокинон ба бемории ҳамагири навъи COVID-19 ба қайд гирифта шудааст.
"Аз ин теъдод 6 нафар аз бемории каронавирус фавтиданд", - гуфт масъули Идораи тандурустии Суғд.
Ҳоҷибоев ҳамчунин дар бораи бемории сироятии илтиҳоби шуш ибрози андеша кард.
Ӯ гуфт, ки "ин беморӣ буд, ҳаст ва мемонад. Беморӣ барангезадаҳои гуногун дорад. Масалан бактериологӣ, вирусӣ ва ё замбуруғию микс инфексионӣ".
Бино ба гуфти Маъруф Ҳоҷибоев соли 2020 дар шаҳри Хуҷанд шумори гирифторони бемории илтиҳоби шуш дар муқоиса ба солҳои қаблӣ то 230 ҳолат зиёд ба қайд гирифта шудааст.
Масъули Идораи тандурустӣ риояи реҷаи ниқобӣ, нигоҳ доштани фосилаи иҷтимоиро аз роҳҳои муҳифизат аз сирояти ин беморӣ хонд.