ДУШАНБЕ, 3 фев – Sputnik. Тибқи иттилои Юсуф Раҳмон, прокурори генералии Тоҷикистон, соли сипаришуда 1 118 (1063) ҷиноятҳои хусусияти экстремистию террористидошта ба қайд гирифта шудааст.
Ба иттилои манбаъ, ин нишондиҳанда нисбат ба соли 2019-ум 55 адад ё 5% зиёдтар мебошанд.
Прокурор гуфт, дар ин давра ду ҷинояти сӯиқасд ба терроризм ва 20 ҷинояти маблағгузории терроризм ошкору ба қайд гирифта шуд.
Ӯ зимни нишасти хабарии ниҳоди тобеяш зикр кард, ки танҳо як моҳи охир даҳ нафар шаҳрвандони кишвар барои ҳамкорӣ "бо ҷинояткорон ва иғвоангезоне, ки дар хориҷи кишвар қарор доранд", боздошт ва ҳабс карда шудаанд.
Ба гуфти прокурори генералӣ, боздоштшудаҳо маълумоти бардурӯғу иғвоангезона ба онҳо ирсол мекарданд.
Номбурда гуфт, "вақтҳои охир ҳуҷумҳои иттилоотӣ аз ҷониби афроди иғвогар ва ҷинояткорони дар хориҷ аз кишварбуда", бештар шудааст.