ДУШАНБЕ, 2 сен — Sputnik. Дар фармони раисҷумҳурии Афғонистон, ки дар торнамои раёсати ҷумҳурии ин кишвар мунташир шудааст, номҳои Ҳомид Карзай, раисиҷумҳури пешин, Абдураб Расули Сайёф, Гулбиддин Ҳикматёр ва Муҳаммади Муҳаққиқ, аз раҳбарони ҷиҳодӣ, Юнус Қонунӣ, муовини аввали пешини раисиҷумҳур, Карим Халилӣ, раҳбари ҷиҳодӣ ва раиси пешини Шӯрои олии сулҳ, маршал Абдурашид Дӯстум, раҳбари ҷунбиши миллии исломӣ ва шуморе дигар аз чеҳраҳои ҷиҳодӣ ва сиёсӣ дида мешавад, иттилоъ додааст хабаргузории “Парстудей” дар истинод ба ИРНА.
Бино бар иттилои манбаъ, бо эъломи номҳои аъзои ин Шӯро, Ҳомид Карзай, раисҷумҳурии собиқ нахустин касе буд, ки ба он вокуниш нишон дод ва узвият дар онро рад кард.
Абдуллоҳ Абдуллоҳ, раиси Шӯрои олии мусолиҳаи миллии Афғонистон низ дар вокуниш ба дастури Ашраф Ғанӣ барои ташкили ин шӯро таъкид кард, ки эҷоди Шӯрои олии мусолиҳаи миллӣ аз салоҳиятҳои раиси ин шӯро аст ва эҷоби фармони раёсатиҷумҳуриро намекунад.
Ҳизби ҷамъияти исломии Афғонистон ба раҳбарии Салоҳиддин Раббонӣ, Ҳизби исломӣ ба раҳбарии Гулбиддин Ҳикматёр, Ҳизби ваҳдати исломии Афғонистон ба раҳбарии Муҳаммадкарим Халилӣ, Ҳизби миллати Афғонистон ба раҳбарии Ҷаъфари Маҳдавӣ, Комиссиюни ҳуқуқи башар, Раҳматуллоҳ Набел, раиси собиқи идораи амнияти миллӣ, Муҳамад Исмоилхон, аз раҳбарони ҷиҳодӣ ва шуморе дигар аз ҳизбҳову сиёсатмадорони афғон низ ташкили шӯрои олии мусолиҳаро ғайриқобилииқабул хонда ва раиси ҷумҳурӣ - Ғаниро муттаҳам кардаанд, ки ҳама чизро дар чорчӯби тими давлатсоз ба раҳбарии худ эҷод мекунад.
Шӯрои олии мусолиҳаи миллии Афғонистон пас аз танишҳои интихоботи раёсатиҷумҳурии соли 2019 бар асоси тавофуқи сиёсӣ байни ду тараф эҷод ва раёсати он бар ӯҳдаи Абдуллоҳ Абдуллоҳ гузошта шуд.