ДУШАНБЕ, 15 мая — Sputnik. Дар Ӯзбекистон то 1 - уми июн дар робита ба паҳншавии вируси COVID-19 реҷаи қарантин тамдид мешавад, хабар медиҳад ситоди фаврии назди ҳукумати ин кишвар.
"Дар Ӯзбекистон чораҳои маҳдудкунанда (қарантин) ва инчунин тартиби мукаммали мубориза бо паҳншавии сирояти коронавирус то 1 - уми июн дароз карда шуд", - омадааст дар хабари ситод.
Шумораи гирифторони коронавирус дар Ӯзбекистон боз рӯ ба афзоиш ниҳод
Бо вуҷуди ин, барои шаҳрвандон баъзе имтиёзҳо ҷорӣ карда шуданд. Ҳамин тавр, аз 15 май кори боғҳои фароғатӣ, осорхонаҳо ва майдонҳои варзишӣ дубора аз сар гирифта мешавад.
Зимнан, сар аз 18 - уми май Ӯзбекистон робитаҳои ҳавоӣ ва роҳи оҳанро дар дохили кишвар қисман барқарор мекунад.
Тибқи иттилои ситод, парвозҳо байни Тошканд ва Нукус, Ургенч дар шимолу ғарби кишвар ва инчунин дар ҷануб Термиз, ҳаракати қатораи баландсуръати "Афросиёб" ба Самарқанд, Навоӣ, Бухоро, Қаршӣ ва қатораҳо ба водии Фарғона дубора барқарор карда мешавад.
Қобили зикр аст, ки дар Ӯзбекистон ба ҳолати то 15 - уми май 2652 дардманди коронавирус ба қайд гирифта шудааст.