ДУШАНБЕ, 11 май — Sputnik. Дар шаҳри Конибодом раиси вилоят бо табибон ва ҳамшираҳои шафқати беморхонаи марказии шаҳр мулоқот намуда, аз шароити кору таъминоти доруворию таҷҳизоти муҳофизатӣ пурсон шуд, хабар дод котиботи ҳукумати Суғд.
Ба иттилои манбаъ, ба раиси вилоят иттилоъ дода шуд, ки айни ҳол дар беморхонаи марказии шаҳри Конибодом 11 нафар бо бемории коронавирус ва илтиҳоби шуш бистарӣ карда шудаанд.
"Барои муолиҷаи беморон дорувории зарурӣ мавҷуд буда, духтурон бо либосҳои махсус таъмин ҳастанд. Ҳамчунин шароитҳои зарурии будубош ва бо се вақт ғизо таъмин мебошанд", - омадааст дар иттилоия.
Раиси вилоят дастур додаст, ки табибон аз ҷониби роҳбарияти шаҳр ҳавасманд ва дастгирь карда шаванд. Таъкид шудааст, ки барои пешгирӣ аз паҳншавии Covid- 19 дар байни аҳолӣ корҳои ташвиқотӣ ва пешгирикунанда мунтазам бурда шавад.
Котиботи ҳукумати Суғд, илова намуд, ки аз ҷониби раиси вилоят ба беморхонаи марказии шаҳри Конибодом корҷомаҳои муҳофизатӣ, маводи антисептикӣ, маводи доруворӣ барои муолиҷаи беморон дастрас карда шуд.