ДУШАНБЕ, 1 май — Sputnik. Киёнӯши Ҷаҳонпур, раиси маркази равобити умумӣ ва иттилоърасонии Вазорати беҳдошти Эрон ахиран дар гуфтугӯ бо хабарнигорон гуфт дар 24 соати ахир дар ин кишвар 983 бемори ҷадид ба қайд гирифта шудааст, иттилоъ додааст хабаргузории “Парстудей”.
Вай афзуд, то кунун дар Эрон 94 ҳазору 640 нафар ба вируси корона мубтало шудаанд.
Ҷаҳонпур ҳамчунин қайд кард, ки дар 24 соати ахир фавти 71 нафар ба қайд гирифта шудааст. Дар маҷмӯъ, шумори фавтидагон аз вируси корона дар Эрон ба 6 ҳазору 28 нафар расидааст.
Теъдоди афроди мубтало ба вируси корона дар ҷаҳон низ ба беш аз 3 миллиону 232 ҳазор нафар расидааст, ки аз ин теъдод дастикам 228 ҳазор нафар ҷони худро аз даст доданд ва беш аз як миллион нафар низ беҳбуд ёфта ва аз бемористонҳо мураххас шудаанд.