ДУШАНБЕ, 30 окт — Sputnik. Тибқи иттилои Додситонии кулли Тоҷикистон, Бобоев моҳи майи соли 2013 дар шаҳри Новосибирск бо Нуриддин Охунзода барои интиқоли нашъа аз шаҳри Хуҷанд ва пардохти 40 000 рубли русӣ маслиҳат кардаанд.
Манбаъ афзуд, ки Охунзода 15 майи соли 2013 тавассути ҳавопаймо аз шаҳри Новосибирск ба шаҳри Хуҷанд омада, дар меҳмонхонаи "Ленинобод" маскан гирифтааст.
“Пас аз 3 рӯз санаи 18 май аз тарафи шахсияти ба тафтишоти пешакӣ номаълум ба Охунзода телефонӣ хабар дода шудааст, ки дар боғи фарҳангии истироҳатии ба номи Камоли Хуҷандӣ ғилофакҳои резинии ҳомили героин ва чиптаи ҳавопаймои масири Хуҷанд-Новосибирск пинҳон карда шудааст”, - омадааст дар иттилоия.
Додситонӣ тавзеҳ дод, ки Охунзода 19 май 96 адад ғилофакро фурӯ бурда, соати тахминан 16:00 ба фурудгоҳ омад ва боздошт гардид.
“Бо мудохилаи тиббӣ 96 адад ғилофакҳои бо маводи нашъадор пуркардашуда аз меъдаи Охунзода. гирифта шуд, ки ҳаҷми умумии он 385,1 грамро ташкил намудааст”, - омадааст дар иттилоия.
Манбаъ илова намуд, ки Бобоев он замон аз ҷои ҳодиса ғайб зад ва аз ҷониби мақомоти Тоҷикистон мавриди пайгард қарор гирифт.
Ба иттилои Додситонии кул, Бобоев моҳи феврали соли равон ихтиёран ба раёсати умури дохилии вилояти Суғд таслим шуда, ахиран бо ҳукми додгоҳи шаҳри Истиқлол ба 9 соли зиндони низомаш пурзӯр маҳкум шуд.