Бино бар иттилои дафтари матбуоти ҳукумати вилояти Суғд, маросими ҷамъбастии машқҳои муштараки амалиётӣ-стратегӣ рӯзи 5 сентябр бо иштироки Вазири мудофиаи Тоҷикистон Шералӣ Мирзо ва Раиси вилояти Суғд Раҷаббой Аҳмадзода дар машқгоҳи низомии “Чорухдаррон” доир шуд.
Манбаъ зикр кардааст, ки размоиши мазкур, дар чор марҳила ба таври назариявию амалӣ гузаронида шуд.
Тавре манбаъ қайд намудааст, ҳадафи баргузории машқҳои муштараки амалиётӣ-тактикӣ бо қушўнҳои гарнизони Суғд сайқал додани таҷрибаи ҳайати шахсии ширкаткунандагон дар ташкили амалиёти бомуваффақонаи ҷангӣ, ҳамоҳангии сохторҳои низомии вилоят дар сурати ба вуқӯъ пайвастани хатарҳои эҳтимолӣ, санҷиши дурусти амалиётӣ-тактикӣ, вусъат додани қувва ва воситаҳои минтақаи мудофиаи ҳудудӣ, баланд бардоштани омодагии рўҳиву равонӣ, қобилияти ҷангиву ҷисмонӣ ва сафарбарии қӯшунҳо дар самти доир кардани унсурҳои мухталифи ҷангӣ дар шароити дашту саҳро ва кўҳистони ҳудуди вилоятро дар бар мегирад.
Дар Тоҷикистон бо ширкати нерӯҳои Русия размоиш баргузор мешавад
Дар машқҳо тамоми ҷузъу томҳои гарнизони Суғд, қувва ва воситаҳои Минтақаи мудофиаи ҳудудии №3, инчунин ҳайати роҳбарикунанда аз Дастгоҳи марказии Вазорати мудофиа, Ситоди генералӣ ва навъҳои Қувваҳои мусаллаҳ, Гвардияи миллӣ, Қўшунҳои дохилии Вазорати корҳои дохилӣ, Қӯшунҳои сарҳадии Кумитаи давлатии амнияти миллӣ, Кумитаи ҳолатҳои фавқулода ва мудофиаи гражданӣ ва шаҳрвандони дар эҳтиётбуда ҷалб шуданд.
Дар ҳамин ҳол, вазири мудофиаи Тоҷикистон Шералӣ Мирзо зимни суханронии таъкид намудааст, ки мақсади баргузории тамринҳо ин баланд бардоштани омодагии ҷангӣ, пурзӯр намудани ҳамкории сохторҳои низомӣ ва беҳтар намудани омодабошии шаҳрвандони дар эҳтиётбуда ба ҳисоб меравад.
Сипас, ба як қатор хизматчиёни ҳарбӣ рутбаҳои навбатӣ, медалу Ифтихорномаи Вазорати мудофиаи Тоҷикистон ва Сипосномаи Мақомоти вилоят супорида шуд.