ДУШАНБЕ, 19 июн — Sputnik. Қарор аст, дар мактабҳои Тоҷикистон аз синфи як барномаи омӯзиши забони русӣ ва англисиро ба роҳ монанд, иттилоъ додааст хабаргузории ТоҷикТА.
Ин масъала ахиран дар Вазорати маорифи Тоҷикистон зимни баррасии масълаи стратегияи рушди маорифи кишвар барои солҳои 2021-2030 муҳокима гардид.
Нуриддин Саид, вазири маорифи кишвар инчунин таваҷҷуҳи ҳозиринро ба масоили соҳаи маориф ҷалб намуд. Вай таъкид намуд, ки мактабҳо бояд бо равоншиносон, омӯзгрони варзиш ва омодагии дифоӣ таъмин бошанд.
Инчунин, ба гуфтаи вазир тамоми мактабҳои кишвар дар оянда бояд акредетатсияи байналмилалӣ гузаранд.
Ёдарс мешавем, ки қаблан Нуриддин Саид ваъда дода буд, ки дар Русия барои кӯдакони муҳоҷирони меҳнатӣ мактабҳои якшанбегӣ ташкил карда мешавад. Вай ҳамчунин зикр намуд буд, ки мактабҳо дар Русия дар ҷойҳое сохта мешаванд, ки дар онҷо ҳузури муҳоҷирони тоҷик зиёд ба назар мерасад.