ДУШАНБЕ, 16 июн — Sputnik. “Парвинамо” дар иҷрои Хонзода бо бархе ороишоти ҷадид дар шабакаҳои иҷтимоӣ нашр гардида, тайи се рӯзи охир онро ҳазорҳо нафар писандида, садҳо нафар бознашр намудаанд.
Шарҳнависон бо изҳори сипос ба Хонзода аз овозу иҷроиши ӯ тавсиф кардаанд. Бархе бо таъкиди ҳунармандии Хонзода изҳор доштаанд, ки нолаҳои Муборакшо Мирзошоев дар ин суруд дигар буду дар қалби мухлисон ҷойи хоси худро доранд.
Муборакшо моҳи августи соли 1961 дар деҳаи Емси ноҳияи Рӯшони вилояти Бадахшон таваллуд шуда, моҳи феврали соли 2000-ум даргузашт.
Хонаводаи Муборакшо фарҳангӣ буд, аз ин рӯ қариб ҳамаи узви хонавода ба мусиқӣ шавқ доштанд. Муборакшо ҳанӯз дар синни 14-солагӣ аввалин оҳангашро иҷро кардааст, аммо фаъолияти касбии ҳунарии худро соли 1988 дар гурӯҳи Далер Назаров оғоз намудааст.
То имрӯз сурудҳои "Ай ёрам биё", "Ғарибӣ", "Равон шуданд чор ҷавон", "Парвинамо", "Сабза ба ноз", "Хиромон", "Туро намепарастам" ва ғайра дар Тоҷикистон ва берун аз он зиёд садо медиҳанд.