ДУШАНБЕ, 14 май — Sputnik. Тибқи маълумоти омории Маркази миллии тестӣ оид ба ҷараёни интихоби муассисаҳои таълимии олии кишвар, ба Муассисаи давлатии таълимии Донишгоҳи давлатии Хуҷанд ба номи академик Бобоҷон Ғафуров 75 331 ҳуҷҷат супорида шудааст.
Тавре мақомоти вилояти Суғд бо такя ба Донишгоҳи давлатии Хуҷанд хабар медиҳад, ин нишондиҳанда аз 1 март то 30 апрели соли 2019 (дар асоси коркарди аввал) пешниҳод гардида, Донишгоҳи давлатии Хуҷанд ба номи академик Бобоҷон Ғафуров баъд аз Донишгоҳи миллии Тоҷикистон мақоми дуюм касб намудааст.
"Бояд тазаккур дод, ки дар ин раванд Донишгоҳи давлатии Хуҷанд ба номи академик Бобоҷон Ғафуров дар байни муассисаҳои олии вилояти Суғд мавқеи аввалро гирифтааст",-омадааст дар хабарнома.
Оғози Довталаб -2019 бо 2 навгонӣ: дохилшавӣ ба “ДОМ”-и Оқохон низ тариқи МТС мешавад
Довталабон дар кластери якум ба ихтисосҳои информатика, математика, дар кластери дуюм ба ихтисосҳои кори бонкӣ, география, дар кластери сеюм ба ихтисосҳои таҳсилоти ибтидоӣ, забон ва адабиёти тоҷик, забони хориҷӣ, забон ва адабиёти рус, дар кластери чорум ба ихтисосҳои таърих, таърих ва ҳуқуқ ва дар кластери панҷум ба ихтисосҳои биология, химия, биология ва химия, кори тиббӣ-биологӣ таваҷҷуҳи бештар зоҳир намудаанд.