ДУШАНБЕ, 16 апр – Sputnik. Дафтари матбуотии Вазорати умури дохилаи Тоҷикистон аз рабудани воситаи нақлиёт дар ҳолати мастӣ хабар додааст.
Манбаъ афзудааст, ки бо доир намудани чорабиниҳои оперативӣ-ҷустуҷӯӣ аз ҷониби кормандони милитсия марди 27-солаи сокини шаҳри Хуҷанд, ки пеш бо моддаи 237 Кодекси ҷиноятии Ҷумҳурии Тоҷикистон суд шудааст, ҳамчун гумонбар дар ғайриқонунӣ ҳай карда бурдани воситаи нақлиёт бидуни мақсади тасарруф, дастгир карда шуд.
Номбурда, рӯзи 8-уми марти соли 2019, тахминан соати 23:40-дақиқа, дар ҳолати мастӣ автомашинаи тамғаи “Опел-Зафира”-ро, ки ба марди 27-солаи сокини шаҳри Хуҷанд тааллуқ дорад, ғайриқонунӣ ҳай карда бурдааст.
Зимни ҳаракат дар роҳи нақлиётгарди “Конибодом-Б.Ғафуров-Деҳмой” аз ӯҳдаи идораи автомашина набаромада, онро чаппа кардааст.
Зарари расонидашуда 10 000-сомониро ташкил медиҳад.
Нисбати номбурда парвандаи ҷиноятӣ бо моддаи 252 қисми 3 Кодекси ҷиноятии Ҷумҳурии Тоҷикистон оғоз гардида, тафтишот идома дорад.