ДУШАНБЕ, 14 июн — Sputnik. Дар ҳоле, ки варзишкори машҳури тими Аргентина Лионел Месси ба сабқатҳои дарпешистода омодагии ҷиддӣ мебинад, "нусхаи" эронии вай дар кӯчаҳои марказии Маскав гашта, ба ҳаводорони Месси ба шавқ соядаст тақсим мекунад.
"Дар ҳақиқат ба ҳаводорон мушкил аст, ки Мессии аслиро аз сохтааш фарқ кунанд. Ризои Парастиши эронӣ сахт ба Месси монанд аст.
Маҳз ба хотири шабоҳат ба Месси Ризо парастишро дар Эрон машуҳр кард. Ӯ ҳоло аз тамоми ҷаҳон мухлисони зиёди худро пайдо кардааст.
Ҳамандоми футболбози аргентинӣ ба Русия барои дастгирии тими мунтахаби Эрон омадааст.
Ризо ҳар рӯз ба Инстаграм дар бораи саргузаштҳои аҷибе, ки бо вай рух медиҳад, навор ё акс мегузорад.
Дар шабакаҳои иҷтимоӣ навиштаанд, ки гӯё пулиси Маскав Мессии эрониро барои ким кадом қонуншиканиаш боздошт кардааст.
Аммо муҳофизони ҳуқуқи Маскав дар асл дар фикри боздошти "футболбоз" ҳам набуданд.
Онҳо низ ӯро Мессии ҳақиқӣ пиндошта, аз ҳаводороне, ки ӯро иҳота карда буданд, хоҳиш мекарданд, ки тартиботро риоя кунанд.
Ҳатто кормандони Росгвардия ҳам бо "Месси" акс ва соядаст гирифтанд.
"Рӯзи гузашта овоза пайдо шуд, ки гӯё пулиси Маскав маро боздошт кардааст. Ин дуруғ аст. Шумо метавонед асли қазияро аз навор тамошо кунед: мухлисони футбол, ки аз кишварҳои гуногуни ҷаҳон омада буданд, ба назди ман омада, хоҳиш мекарданд, ки якҷо акс гирем. Дар натиҷаи роҳро мухлисон бастанд. Кормандони пулиси Маскав маро бо эҳтироми хос ба ҷое дар назди девори Кремл бурданд, ки он ҷо оромтар буд. Кормандони пулис ҳам аз ман хоҳиш карданд, ки акс гирем ва ман ба онҳо соядаст додам", — навиштааст Мессии эронӣ.
Ризо Парастиш дар Эрон ягона ҳамандоми ситораҳои ҷоҳонӣ нест. Дар кӯчаҳои Теҳрон ҳамчунин метавон бо Криштиану Роналду ва Луис Суарес акс гирифт. Аммо ба Ҷоми футболи ҷаҳон дар Русия танҳо Мессии эронӣ расидаасту халос.