ДУШАНБЕ, 22 янв — Sputnik. Дар ин бора равобити умумии Вазорати корҳои хориҷӣ хабар медиҳад.
Дар ин ҳамоиш Дабири Кулли СММ, вазирони корҳои хориҷии Қазоқистон, Тоҷикистон, Узбекистон, Қирғизистон, Кувайт, Россия, Гвинеяи Экваторӣ, муовинони вазири корҳои хориҷии ИМА, Афғонистон, Недерланд ва дигар намояндагони кишварҳои аъзои СММ ширкат ва суханронӣ кардаанд.
Зимни суханронии худ, вазири корҳои хориҷии Тоҷикистон таваҷҷуҳи иштирокчиёнро ба мушкилоти доғи рӯз дар минтақа, аз ҷумла бадшавии вазъ дар Афғонистон, афзоиши терроризми байналмилалӣ, экстремизми динӣ, ҷинояткориҳои муташаккили фаромиллӣ, қочоқи ғайриқонунии маводи мухаддир ва тағйирёбии муҳити зист ҷалб намудааст.
"Тоҷикистон ҳамчун кишвари ҷонибдори ҳарчӣ зудтар барқарор кардани сулҳу амният дар Афғонистон тавассути рушди иқтисодӣ ва иҷтимоии он кишвар, бар он ақидааст, ки ҳамкориҳои минтақавӣ унсури муҳим дар таҳкими субот дар ин кишвари ҷангзада ва дар саросари минтақа мебошад", — гуфтааст Аслов.
Барои ҳалли мушкилоти болозикр пиёдасозии иқдомоти қавитар тариқи тавсеаи ҳамкориҳо ва шарокати минтақавӣ зарур арзёбӣ гардидааст.
Сироҷиддин Аслов ҳамчунин аз ҷомеаи ҷаҳонӣ даъват ба амал овардааст, ки барои татбиқи пружаҳои иҷтимою иқтисодӣ дар ин кишвар, бахусус лоиҳаҳои минтақавӣ ба мисли КАСА-1000, ТУТАП ва ғайраҳо, ки барои рушди устувори Афғонистон заминаи муҳим мегузоранд, кумакҳои беғаразонаи худро дареғ надоранд.