ДУШАНБЕ, 11 май — Sputnik. Раисҷумҳури Тоҷикистон Эмомалӣ Раҳмон бо сафари давлатӣ ба Чин сафар кард.
Дар ин бора Хадамоти матбуоти раисҷумҳури кишвар хабар додааст.
Ба иттилои манбаъ, дар ин сафар Президенти кишварро вазири корҳои хориҷӣ, ёрдамчии Президент дар умури масоили робитаҳои хориҷӣ ва роҳбарони як қатор вазорату идораҳои дахлдор ҳамроҳӣ доранд.
Тавре қаблан вазорати хориҷаи Тоҷикистон хабар дода буд, раисҷумҳури кишвар бо даъвати раҳбари Чин Си Ҷинпин ба Чин сафар мекунад.
Дар доираи сафар мулоқоти сатҳи олӣ баргузор гардида, дар он маҷмӯи васеи масоили ҳамкориҳои дуҷониба дар соҳаҳои сиёсат, иқтисод ва тиҷорат, саноат, сармоягузорӣ ва гуманитарӣ мавриди баррасӣ қарор мегиранд.
Ҳамчунин ҷонибҳо барои татбиқи лоиҳаҳои муштарак дар самтҳои афзалиятнок, аз ҷумла энергетика "иқтисоди сабз" ва технологияҳои рақамӣ мубодилаи афкори созанда хоҳанд кард.
Вазорати хориҷа таъкид кардааст, ки роҳбарони ду кишвар дар дидору мулоқотҳо инчунин вазъи минтақа ва таҳкими ҳамкориҳо дар самти мубориза бар зидди таҳдидҳои муосир дар доираи робитаҳо дар созмонҳои минтақавӣ ва байналмилалиро баррасӣ хоҳанд кард.
Қайд карда шудааст, ки аз натиҷаи мулоқоти сатҳи олӣ, имзои бастаи нави санадҳои дуҷониба дар назар аст, ки заминаи ҳуқуқии муносибатҳои Тоҷикистону Чинро ба таври назаррас таҳким мебахшад.
Зикр гардидааст, ки сафари мазкур идомаи мантиқии муколамаи сиёсии сарони давлатҳо буда, ба таҳкими дӯстии деринаи мардумон ва ҳамсоягии неки ду кишвар такони нав хоҳад бахшид.
Ёдовар мешавем, ки дар таърихи муносибатҳои дуҷониба президенти Тоҷикистон Эмомалӣ Раҳмон сафарҳои расмӣ, давлатӣ ва корӣ (солҳои 1993, 1996, 1999, 2001, 2003, 2007, 2012, 2013, 2014, 2015, 2017, 2018, 2019 ва 2023) ба Чин анҷом додааст.
Дар ҷараёни ин сафарҳо санадҳои муҳими сиёсӣ, иқтисодӣ, иҷтимоӣ ва фарҳангӣ ба имзо расидаанд. Аввалин сафари расмии Президенти Тоҷикистон Эмомалӣ Раҳмон ба Чин моҳи марти соли 1993 сурат гирифт, ки дар рафти он ба ҳамкориҳои дуҷониба заминаҳо гузошта шудаанд.
Ба иттилои вазорати корҳои хориҷии Тоҷикистон миёни ду кишвар зиёда аз 250 санади дуҷониба ба имзо расидааст.