ДУШАНБЕ, 27 апр — Sputnik. Дар моҳҳои январ – марти соли равон 6336 ҷиноят ба қайд гирифта шудааст, аз он ҷумла 5573 ҷиноятро Вазорати корҳои дохилии Тоҷикистон ва Прокуратура ба қайд гирифтаанд ки 88% шумораи умумии ҷиноятҳои ба қайд гирифташударо ташкил медиҳад.
Дар ин бора Агентии омори Тоыикистон хабар додааст.
Ба иттилои Агентӣ, дигар мақомоти ҳифзи ҳуқуқ 763 ҷиноят ё 12% шумораи умумии ҷиноятро ба қайд гирифтаанд.
Қайд карда шудааст, ки дар моҳҳои январ - марти соли 2026 шумори ҷиноятҳои бақайдгирифташуда дар шаҳри Душанбе 8,2%, ва дар ноҳияҳои тобеи ҷумҳурӣ 11,4%, кам шуда, дар вилояти Суғд 0,3% ва дар вилояти Хатлон 5,5% зиёд шудааст.
Ҳамчунин қайд карда шудааст, ки дар моҳҳои январ - марти соли равон 1415 ҷинояти вазнин ба қайд гирифта шудааст, ки нисбат ба моҳҳои январ - марти соли 2025-ум 12,8% кам шудааст.
“Нисбат ба моҳҳои январ - марти соли 2025 бақайдгирии ҳодисаҳои куштор ва сўиқасд ба он 51,7%, қасдан расонидани зарари вазнин ба саломатӣ 32,3%, таҷовуз ба номус ва сӯиқасд ба он 18,2%, дуздӣ 3,9%, қаллобӣ 4,5% ва авбошӣ 3,3% кам шудааст”, - хабар додааст Агентии омори кишвар.
Дар ҳамин ҳол ба иттилои омори Агентӣ, нисбат ба моҳҳои январ - марти соли 2025 бақайдгирии ҳодисаҳои ғоратгарӣ 26,1%, ҷиноятҳои вобаста ба маводи мухаддир 36,6% ва вайрон кардани қоидаҳои ҳаракати роҳҳо 1,5% зиёд шудааст.
Дар давраи ҳисобот 837 ҷинояти иқтисодӣ (нисбат ба моҳҳои январ - марти соли 2025-ум 3,7% кам шудааст) ба қайд гирифта шудааст, ки мақомоти корҳои дохилӣ 355 ҷиноятро ошкор кардаанд, аз рўи 343 ҷиноят парвандаи ҷиноятӣ кушода шудааст.
Инчунин дар моҳҳои январ - марти соли равон 117 ҳодисаи вайрон кардани қоидаҳои ҳаракати роҳҳ, ки оқибат бо ҷароҳати сахт ва марги ҷабрдида анҷомидаанд ба қайд гирифта шуданд (нисбат ба ҳамин давраи соли гузашта 9,3% кам шудааст).
Зикр гардидааст, ки ошкоркунии умумии ҷиноятҳо дар моҳҳои январ - марти соли 2026-ум 57,7%-ро ташкил кардааст, дар моҳҳои январ - марти соли 2025-ум 56,7% буд.