ДУШАНБЕ, 27 апр — Sputnik. Эрон формулаи музокироти семарҳилавиро тавассути миёнҷигарон ба Иёлоти Муттаҳида расонидааст, хабар медиҳад Al Mayadeen.
"Эрон миёнаравонро дар бораи формати музокирот, ки бар асоси се марҳила асос ёфтааст, огоҳ кардааст ва агар Вашингтон онро қабул кунад, Теҳрон мувофиқи он музокирот хоҳад кард",- хабар медиҳад нашрия.
Тибқи ин ташаббус, марҳилаи аввали музокирот бояд ба хотима додан ба ҷанг ва гирифтани кафолатҳо аз амалиёти минбаъдаи низомӣ алайҳи Эрон ва Лубнон нигаронида шавад.
Нашрия изҳор медорад, ки агар ба созиш бирасад, ҷонибҳо ба марҳилаи дуюм мегузаранд, ки дар он тарзи идоракунии гулӯгоҳи Ҳурмуз пас аз ҷанг, бо ҳамоҳангӣ бо ҷониби Уммон "барои таъсиси низоми нави ҳуқуқӣ" баррасӣ мешавад.
Ин нашрия иддао дорад, ки гузариш ба марҳилаи сеюм, ки ба муҳокимаи барномаи ҳастаии Эрон марбут аст, бидуни созиш дар бораи марҳилаҳои аввал ва дуюм сурат намегирад.
Дар ҳаимн ҳол Axios бо истинод ба як мақоми амрикоӣ ва ду манбаи дигари огоҳ, инчунин хабар дод, ки Эрон тавассути миёнҷигарони покистонӣ пешниҳодеро ироа кардааст, ки даъват ба кушодани гулӯгоҳи Ҳурмуз ва ҳалли ниҳоии низоъро карда, музокиротро дар бораи масъалаи ҳастаӣ то санаи баъдтар ба таъхир андохтааст.
Вазири корҳои хориҷии Эрон ба миёнҷигарон гуфтааст, ки дар дохили роҳбарияти Ҷумҳурии Исломӣ дар бораи талабҳои ИМА барои қатъ кардани ғанигардонии уран ва хориҷ кардани он аз кишвар ягон иттифоқи назар вуҷуд надорад.
Рӯзи шанбе, президенти ИМА Доналд Трамп эълон кард, ки сафари ҳайати намояндагонашро ба Исломобод барои музокирот бо ҷониби Эрон лағв кардааст. Дертар дар ҳамон рӯз, ӯ иддао кард, ки ИМА аз Теҳрон пешниҳоди наверо бо шартҳои мусоидтар гирифтааст.
Эрон дар аввал нақшаҳои мулоқот бо амрикоиҳоро рад кард. Аз ҷониби худ, президенти Эрон Масъуд Пезешкиён дар сӯҳбат бо сарвазири Покистон Шаҳбоз Шариф изҳор дошт, ки кишвар таҳти фишор, таҳдид ё муҳосираи киштиронӣ дар музокироти сулҳ иштирок нахоҳад кард.
8 апрел Вашингтон ва Теҳрон оташбаси дуҳафтаина эълон карданд, аммо музокироти баъдӣ натиҷа надоданд. ИМА муҳосираи бандарҳоро барои Эрон эълон кард ва ваъда дод, ки онро танҳо пас аз ба даст овардани созиш бекор мекунад.
Ҷумҳурии Исломӣ бо бастани гулӯгоҳи Ҳурмуз ва рад кардани тамосҳои минбаъда посух дод. Дар ҳамин ҳол, Трамп якҷониба оташбасро тамдид кард. Ӯ гуфт, ки он то он даме, ки Эрон пешниҳодҳои ҳалли масирро омода накунад ва ҳайатҳо мулоқот накунанд, эътибор хоҳад дошт.