ДУШАНБЕ, 25 мар – Sputnik. Дар пойтахти Тоҷикистон Мусобиқаи байналмилалии "Dushanbe Grand Slam 2026" дар риштаи ҷудо баргузор мешавад.
Ин сабқат аз 1 то 3 майи соли 2026 дар шаҳри Душанбе дар назар аст.
Рақобат аз рӯи 14 вазн — 7 вазн байни мардон ва 7 вазн байни занон баргузор мешавад. Ғолибон ва ҷоизадорони ҳар вазн бо мукофотҳои пулӣ қадрдонӣ мегарданд.
Варзишгарон барои ба даст овардани холҳои муҳими раддабандии ҷаҳонии Федератсияи байналмилалии ҷудо рақобат менамоянд, зеро ин холҳо барои баланд бардоштани мавқеи онҳо дар раддабандии ҷаҳонӣ аҳамияти калон доранд.
Мусобиқа дар доираи силсилаи ҷаҳонии Федератсияи байналмилалии ҷудо баргузор шуда, яке аз бонуфузтарин чорабиниҳои варзишии ҷаҳон дар ин намуди варзиш ба шумор меравад.
Ин мусобиқа чанд маротиба аст, ки беҳтарин ҷудочиёни ҷаҳонро дар пойтахти Тоҷикистон - шаҳри Душанбе ҷамъ меорад.
Баргузории чунин мусобиқаҳои сатҳи байналмилалӣ дар Тоҷикистон ба рушди варзиш, баланд бардоштани маҳорати варзишгарон ва муаррифии имконоти варзишии мамлакат дар арсаи ҷаҳонӣ мусоидат менамояд.