ДУШАНБЕ, 22 мар – Sputnik. Раҳмон дар паёми табрикотии худ ба муносибати ҷашни байналмилалии Наврӯз аз сокинон даъват кард, ки истеҳсоли маҳсулоти хӯроквориро афзоиш диҳанд.
Тоҷикистон дар шароити мушкилоти ҷаҳонӣ ба рушди кишоварзӣ ва амнияти озуқаворӣ таваҷҷӯҳи махсус зоҳир мекунад.
Президент Эмомалӣ Раҳмон ин нуктаро зимни табрикоти ҳамватанон ба муносибати ҷашни баҳории Наврӯз изҳор дошт.
Ба гуфтаи раҳбари Тоҷикистон, дар солҳои охир мушкилоти ҷаҳонӣ, аз ҷумла тағйирёбии иқлим, вазъияти ҷаҳониро мураккабтар ва печидатар кардаанд.
"Мо бояд тамоми кӯшишро барои ба даст овардани ҳосили фаровон, яъне афзоиши истеҳсоли маҳсулоти кишоварзӣ, таъмини бозори истеъмолӣ, беҳтар кардани сатҳ ва сифати зиндагии мардум ва ҳифзи амнияти озуқавории кишвар ба харҷ диҳем", - қайд кард ӯ.
Раҳмон хотиррасон кард, ки аҳолӣ инчунин бояд аз ҳама захираҳо ва имкониятҳои мавҷуда, аз ҷумла ҳар як ваҷаб замин ва қатра об, самаранок истифода баранд.
Ба гуфтаи Раҳмон, ҳамаи деҳқонон ва соҳибони замин дар кишвар "бояд аз ҳар рӯзи мусоиди баҳорӣ истифода баранд".
Наврӯз дар Тоҷикистон ҳамасола ба таври васеъ ҷашн гирифта мешавад ва дар саросари кишвар намоишгоҳҳо ва ярмаркаҳои гуногун баргузор мешаванд. Аз 20 то 29 март ба шарафи ин ид ва инчунин Иди Фитр рӯзҳои истироҳати умумӣ эълон шудаанд.