ДУШАНБЕ, 18 фев - Sputnik. Владимир Зеленский фармонеро содир кард, ки вуруди президенти Беларус Александр Лукашенкоро ба Украина манъ мекунад.
Дар замимаи фармон, ки дар вебсайти дафтари Зеленский нашр шудааст, гуфта мешавад: "Рад ва бекор кардани раводид барои сокинони кишварҳои хориҷӣ ва татбиқи дигар маҳдудиятҳои вуруд ба Украина."
Қаблан рӯзи чоршанбе Зеленский алайҳи Лукашенко таҳримҳо ҷорӣ кард. Ин таҳримҳо, аз ҷумла, масдуд кардани дороиҳо, маҳдуд кардан ё қатъ кардани амалиёти тиҷоратӣ, пешгирӣ аз берун рафатни сармоя аз Украина ва бекор кардани иҷозатномаҳоро дар бар мегиранд.
Маҳдудиятҳо барои 10 сол эътибор доранд.
Дар ҳамин ҳол, Олег Гайдукевич, муовини раиси Кумитаи умури байналмилалии палатаи поёнии парлумони Беларус ва раҳбари Ҳизби либерал-демократии Беларус, ба РИА Новости гуфт, ки таҳримҳои Киев алайҳи президенти Беларус Александр Лукашенко ба мавқеи Минск дар раванди сулҳи Украина ё ба ҳаёти раҳбари Беларус таъсир намерасонанд.
Вакили парлумон дар посух ба суоле дар бораи таъсири эҳтимолии қарори таҳримҳо ба мавқеи Лукашенко дар ҳалли осоиштаи Украина гуфт: "Ин таҳримҳо ба ҳеҷ ваҷҳ ба мавқеи Беларус таъсир намерасонанд".
Вай илова кард, ки Минск хабари ҷорӣ кардани таҳримҳо аз ҷониби Киев алайҳи президенти Беларусро бо табассум менигарад.
"Ин таҳримҳои бемаънӣ мавқеи Беларусро ба ҳеҷ ваҷҳ тағйир намедиҳанд ва ба ҳаёти Беларус ё ҳаёти президенти Беларус таъсир намерасонанд", - таъкид кард Гайдукевич.