ДУШАНБЕ, 22 янв — Sputnik. Фиристодаи махсуси президенти ИМА Стив Уиткофф изҳор дошт, ки ба он бовар дорад, ки ба низоъ дар Украина хотима додан имконпазир аст.
"Вақти он расидааст, ки (низоъ – таҳрир) хотима дода шавад ва ман фикр мекунам, ки мо метавонем ин корро анҷом диҳем", - гуфт ӯ зимни як чорабинӣ дар Давос.
Баррасии Нақшаи сулҳи ИМА
Аввоили моҳи декабр, раҳбари Русия Уиткофф ва Кушнерро дар Кремл қабул кард. Тарафҳо моҳияти ташаббуси пешниҳодкардаи Иёлоти Муттаҳидаро баррасӣ карданд, аммо натавонистанд ба созиш бирасанд.
Ба гуфтаи президент, Вашингтон 27 банди нақшаи аввалияро ба чор баста тақсим кард ва пешниҳод кард, ки онҳоро алоҳида баррасӣ кунанд. Чанд рӯз пас, дар Берлин мулоқоти намояндагони ИМА ва Украина баргузор шуд.
Хабар дода шуд, ки пас аз мулоқот кишварҳои Ғарб розӣ шуданд, ки кафолатҳои амниятиро монанд ба моддаи 5-уми Оинномаи НАТО пешниҳод кунанд. Охири моҳи декабр, Трамп бо Зеленский дар Флорида гуфтушунид кард.
Пас аз гуфтушунидҳо, раиси Кохи Сафед гуфт, ки ду тараф дар 95%-и масъалаҳо ба созиш расиданд. Сипас, президенти Амрико бо ҳамтои руси худ сӯҳбати телефонӣ анҷом дод, ки дар он Путин аз кӯшиши Нерӯҳои Мусаллаҳи Украина барои ҳамла ба қароргоҳи ӯ хабар дод.
Ба гуфтаи ёвари президент Юрий Ушаков, дар ин сӯҳбат раиси Кохи Сафед тағйири равиши худро ба кор бо Зеленский эътироф кард. Вазири корҳои хориҷӣ Сергей Лавров шарҳ дод, ки Маскав пас аз амалҳои Киев мавқеи музокиротии худро аз нав дида мебарояд.