ДУШАНБЕ, 14 янв - Sputnik. Бино ба иттилои Bloomberg, фиристодаи махсус Стив Уиткофф ва домоди президенти ИМА Ҷаред Кушнер ният доранд, ки моҳи январ дар Русия музокирот анҷом диҳанд.
"Стив Уиткофф ва Ҷаред Кушнер нақша доранд, ки дар ояндаи наздик барои мулоқот бо президенти Русия Владимир Путин ба Маскав сафар кунанд. <...> Мулоқот метавонад моҳи равон баргузор шавад", - гуфта мешавад дар гузориш.
Ба гуфтаи ин ниҳод, ҳайати Амрико мехоҳад кафолатҳои амниятии Украинаро баррасӣ к унад ва лоиҳаҳои нақшаҳои ҳалли низоъро пешниҳод кунад.
Баррасии нақшаи сулҳи ИМА
Уиткофф ва Кушнер бори охир моҳи декабр бо Путин дар Кремл мулоқот карданд. Ҷонибҳо моҳияти ташаббуси ИМА-ро муҳокима карданд, аммо натавонистанд ба созиш бирасанд. Ба гуфтаи президент, Вашингтон 27 банди нақшаи аввалияро ба чор баста тақсим кард ва пешниҳод кард, ки онҳоро алоҳида баррасӣ кунанд.
Чанд рӯз пас, дар Берлин мулоқоти намояндагони ИМА ва Украина баргузор шуд. Пас аз мулоқот, хабар дода шуд, ки кишварҳои Ғарб барои таъмини кафолатҳои амниятӣ монанд ба моддаи 5-уми Оинномаи НАТО розӣ шуданд.
Охири моҳи декабр, президенти ИМА Доналд Трамп бо Владимир Зеленский дар Флорида мулоқот кард. Роҳбари Кохи Сафед изҳор дошт, ки ҷонибҳо дар 95% масъалаҳо ба ҳамдигарфаҳмӣ расидаанд. Сипас ӯ бо ҳамтои руси худ сӯҳбати телефонӣ анҷом дод, ки дар он Путин аз кӯшиши Нерӯҳои Мусаллаҳи Украина барои ҳамла ба қароргоҳи ӯ хабар дод.
Чунон ки ёвари президент Юрий Ушаков қайд кард, зимни сӯҳбат Трамп тағйири равиши худро дар кор бо Зеленский эътироф кард. Вазири корҳои хориҷӣ Сергей Лавров шарҳ дод, ки Маскав пас аз амалҳои Киев мавқеи музокиротии худро аз нав дида мебарояд.