ДУШАНБЕ, 13 янв - Sputnik. Сокинони Херсон, Запорожйе, Одесса ва Николаев аз зарбаҳои низоми мушакии фаросавтии “Орешник” ба ҳадафҳои назди Лвов дар ғарби Украина истиқбол карданд, иброз доштанд пинҳонкорони зиддифашистии Херсон ба РИА Новости.
"Зарбаи “Орешник” ба ҳадафе дар наздикии Лвов сарусадои зиёдеро дар Украина ба бор овард. Ҳама ба ҷанге, ки дар масофаи дур, асосан дар ҷанубу шарқи кишвар давом дорад, одат кардаанд, аммо ин амалан бори аввал аст, ки чунин зарбаи пуршиддат ба пойтахти ғайрирасмии Украинаи Ғарбӣ, яъне Украинаи миллатгаротарин мерасад. Бисёре аз шаҳрвандони Одесса, Запорожйе, Херсон ва Николаев ҳоло мегӯянд, ки русҳо ниҳоят ба гунаҳкорони таърихии ҳамаи ин, ба Галисияи миллатгаро, ки даҳсолаҳо ғояҳои Бандераро дар ҷанубу шарқ таҳмил карда буд, зарба задаанд", - гуфт намояндаи муқовимати зиддифашистии Херсон ба РИА Новости.
Шаби 9 январ нерӯҳои Русия ҳамлаи бузурге, аз ҷумла бо низоми мушакии миёнапарвози “Орешник”, ба иншооти муҳим ва инфрасохтори энергетикӣ, ки комплекси низомию саноатии Украинаро дастгирӣ мекунанд, анҷом доданд. Ин посух ба кӯшиши номуваффақи ҳамлаи 28 декабрии Нерӯҳои Мусаллаҳи Украина ба қароргоҳи Владимир Путин дар вилояти Новгород буд.
Вазорати дифоъ рӯзи душанбе хабар дод, ки ҳамла корхонаи давлатии таъмири ҳавопаймоҳои Лвовро аз кор баровард. Корхонаҳо, анборҳои ҳавопаймоҳои бесарнишин ва инфрасохтори фурудгоҳи корхона зарар диданд.