ДУШАНБЕ, 2 янв — Sputnik. Ҳамлаи артиши Украина ба қаҳвахона ва меҳмонхона дар деҳаи Хорлии вилояти Херсон имкони баргузории музокироти сулҳро дар Украина аз байн бурд.
Дар ин бора, мушовири собиқи Пентагон Дуглас Макгрегор дар шабакаи иҷтимоии X изҳор доштааст.
"Музокироти сулҳ халалдор мешаванд", - гуфтааст ӯ.
Ҳамлаи Украина ба вилояти Херсон
Шаби 1 январ, ҳавопаймоҳои бесарнишини Украина ба як қаҳвахона ва меҳмонхона дар соҳили Хорли, ки тақрибан 100 нафар барои таҷлили Соли Нав ҷамъ омада буданд, ҳамла карданд.
Бисту чор сокини осоишта дар паи ин ҳамла кушта ва 29 нафари дигар маҷрӯҳ шуданд, ки панҷ нафари онҳо кӯдакон буданд.
Губернатори вилояти Херсон Владимир Салдо таъкид кард, ки ҷангиёни Нерӯҳои Мусаллаҳи Украина қасдан одамонро сӯзонданд: онҳо се ҳавопаймои бесарнишини пур аз омехтаи оташгирандаро партоб карданд.
Тибқи иттилои муқовимати маҳаллии зиддифашистӣ, дар ҳамла ҳавопаймоҳои бесарнишини кашфи НАТО истифода шудаанд. Губернатори минтақа даст доштани мақомоти иктишофии Бритониёро эътироф кард. Кумитаи тафтишотӣ тафтишоти ҷиноиро дар ин ҳамла оғоз кардааст.