ДУШАНБЕ, 21 дек – Sputnik. Тоҷикистон дар пешбурди дипломатияи обӣ нақши пешбарро мебозад.
Тибқи иттилои хадамоти матбуотии раҳбари Тоҷикистон, президент Эмомалӣ Раҳмон ин масъаларо зимни суханронӣ дар саммити Осиёи Марказӣ ва Ҷопон дар Токио такрор кард.
Президент таваҷҷӯҳро ба оқибатҳои тағйирёбии иқлим, аз қабили обхезӣ, хушксолӣ, хокборишҳо, сел ва харобшавии экосистема ҷалб кард.
"Мо аз аҳамияти ҳифзи захираҳои об ҳамчун пояи асосии амнияти озуқаворӣ, энергетика ва рушди устувор хуб огоҳ ҳастем", - гуфт Раҳмон.
Раҳбари Тоҷикистон аз ҳамаи кишварҳои манфиатдор даъват кард, ки дар конфронси сатҳи баланд оид ба ин мавзӯъ, ки моҳи майи соли 2026 дар Душанбе баргузор мешавад, фаъолона иштирок намоянд.
Дар суханронии худ, Раҳмон инчунин изҳор дошт, ки Тоҷикистон гидроэнергетика, истихроҷи маъдан, истеҳсоли автомобилҳо, металлургия ва саноати сабук ва хӯроквориро самтҳои афзалиятноки ҳамкорӣ бо Ҷопон мешуморад.
Раҳмон аз ҷалби сармоягузориҳо ва технологияҳои Ҷопон барои татбиқи стратегияҳои энергияи сабзи кишварҳои минтақа, бахусус рушди иқтидори гидроэнергетикӣ пуштибонӣ кард.
Раисҷумҳури Тоҷикистон Эмомалӣ Раҳмон рӯзи 18 декабр бо сафари расмӣ ба Токио омад.
Дар Токио, сарвазири Ҷопон Санае Такайчи бо роҳбарони панҷ кишвари Осиёи Марказӣ: Қазоқистон, Қирғизистон, Тоҷикистон, Туркманистон ва Узбакистон: Қосимҷомарт Тоқаев, Содир Ҷапаров, Эмомалӣ Раҳмон, Сердар Бердимуҳамедов ва Шавкат Мирзиёев мулоқот кард.