ДУШАНБЕ, 12 дек - Sputnik. Ҷомеаи ҷаҳонӣ айни замон бо заъфи қонунҳои байналмилалӣ рӯбарӯ аст.
Инро президенти Тоҷикистон Эмомалӣ Раҳмон зимни суханронӣ дар Форуми байналмилалии сулҳ ва эътимод дар Ишқобод изҳор дошт.
"Имрӯз ҷомеаи ҷаҳонӣ бо рақобати мураккаби геополитикӣ ва заъфи қонунҳои байналмилалӣ рӯбарӯ аст", - изҳор дошт кишвардор.
Ӯ таъкид кард, ки дар баробари афзоиши дубораи таҳдидҳо ва чолишҳои амниятӣ, мушкилоти сершумор тамоюли коҳиши рушди иқтисодӣ ва иҷтимоиро ба вуҷуд меоранд.
"Дар чунин шароит, ташаббуси эълон кардани соли 2025 ҳамчун Соли байналмилалии сулҳ ва эътимод аҳамияти хоса пайдо мекунад", - қайд кард Раҳмон.
Ӯ таъкид кард, ки Тоҷикистон барои эҷоди меъмории амнияти ҷаҳонӣ ва таъмини субот саъю кӯшиш мекунад.
"Тоҷикистон ба таъмини сулҳу субот ва тақвияти меъмории амнияти фарогир уҳдадор аст. Мо сиёсати хориҷии худро бар асоси принсипҳои дарҳои боз, эҳтироми мутақобила, баробарӣ ва ҳамкории судманди мутақобила пеш мебарем", - гуфт президент.
Ғайр аз ин, зимни суханронӣ дар Ишқобод, президенти Тоҷикистон таҳдидҳои экологиро ҳамчун як мушкили умумӣ муайян кард.
Раҳмон аз ҷаҳон даъват кард, ки барои мубориза бо обшавии пиряхҳо якҷоя кор кунанд.
"Тағйирёбии иқлим, обшавии босуръати пиряхҳо, ифлосшавии муҳити зист... талошҳои муштараки муттаҳидро талаб мекунанд", - гуфт ӯ.
Раҳмон равандҳои Душанберо дар бораи об ва мубориза алайҳи терроризм ҳамчун платформаи муколама зикр кард.