ДУШАНБЕ, 29 окт — Sputnik. Президенти ИМА Доналд Трамп изҳор дошт, ки сулҳ байни Исроил ва Фаластин ба даст омад, ҳарчанд ба назар ғайриимкон менамуд, яъне бӯҳрони Украина низ ҳал хоҳад шуд.
"Ҳашт (низоъ — шарҳ аз идора) дар ҳашт моҳ ҳал шуд. Фикр мекунам, ки боз як низоъ пас аз он хоҳад буд. Ман фикр мекардам, ки ин (дар мавриди Украина — таҳрир) яке аз осонтарин низоъҳо хоҳад буд. Кӣ фикр мекард, ки мо дар Ховари Миёна ба сулҳ ноил мешавем, аммо байни Русия ва Украина не? Сулҳ дар Ховари Миёна ғайриимкон буд", - гуфт Трамп дар нишасти сарони кишварҳои Ҳамкории иқтисодии Осиё ва Уқёнуси Ором.
Трамп афзуд, ки ӯ ба ҳалли зуди низоъ дар Украина умед дошт, "ба далели муносибат бо президенти (Федератсияи Русия Владимир — таҳрир) Путин".
Ин дар ҳолест, ки ахиран вазири умури хориҷаи Русия Сергей Лавров гуфт, Маскав ҳамчунин ба кафолатҳое умед дорад, ки дар мулоқоти президентҳои Русия ва ИМА ба даст омаданд.
"Мо бисёр умедворем, ки президент Трамп сулҳи воқеии пойдорро мехоҳад, на фароҳам овардани шароит барои ворид кардани идомаи силоҳ ва пул ба режими Киев, то ин ки он талошҳои худро идома диҳад ва ҳамчун абзори аврупоиҳо дар ҷанг алайҳи Русия хидмат кунад",- гуфт Лавров ба хабарнигорон.
Лавров ҳамчунин ёдовар шуд, ки Русия интизори вокуниши мусбати ИМА ба пешниҳоди Путин дар бораи идомаи риояи Шартномаҳо дар бораи кам кардани яроқи стратегии хуҷум тӯли як сол пас аз анҷоми муҳлати созишнома аст. Аҳдномаи мазкур 5 феврали соли 2026 ба охир мерасад.
Амалиёти вижа дар Украина
Русия оғоз аз 24-уми феврали соли 2022 дар Украина амалиёти вижаи низомӣ мебарад. Владимир Путин, президенти Русия, рисолати худро "ҳифозати одамоне, ки тӯли ҳашт сол аз сӯи режими Киев мавриди таҳқир ва наслкушӣ қарор гирифтаанд" тавсиф кард.
Ба гуфтаи вай, ҳадафи ниҳоии амалиёти вижаи низомӣ озодсозии Донбасс ва фароҳам овардани шароитест, ки амнияти худи Русияро кафолат медиҳад.
Кишварҳои ғарбӣ даст доштан дар даргириҳои Украинаро расман рад мекунанд, вале ба таъмини нирӯҳои мусаллаҳи Украина бо силоҳ идома медиҳанд. Вазири корҳои хориҷии Русия Сергей Лавров қайд кард, ки ҳама гуна интиқоли аслиҳа ба Украина ҳадафи қонунии Русия хоҳад буд.
Вазорати хориҷаи Русия изҳор дошт, ки кишварҳои НАТО бо интиқоли силоҳ ба Украина "бо оташ бозӣ мекунанд". Дар ҳамин ҳол, Маскав борҳо омодагии худро барои оғози музокирот дар бораи ҳалли низоъ изҳор доштааст, аммо Киев барои музокирот мамнӯъияти қонунӣ ҷорӣ кардааст.