ДУШАНБЕ, 14 окт — Sputnik. Ду рӯз пас аз бозгашташ аз Душанбе раҳбари Русия Владимир Путин ба раисҷумҳури Тоҷикистон Эмомалӣ Раҳмон занг зад.
Тавре Хадамоти матбуоти раисҷумҳури кишвар хабар додааст, дар суҳбати телефонӣ раҳбари Русия аз раисҷумҳури Тоҷикистон барои пазироӣ ва меҳмоннавозии гарм зимни сафари давлатиаш ба Тоҷикистон изҳори сипос кардааст.
Ҷонибҳо ҳамзамон дар н гуфтугӯи телефонӣ ҷанбаҳои алоҳидаи мувофиқаҳои дар доираи ин сафар бадастомадаро мавриди баррасӣ қарор дода, роҳҳои татбиқи минбаъдаи онҳоро мушаххас сохтанд.
“Ҳамчунин натиҷаҳои муҳими Нишасти сарони давлатҳо дар чорчуби “Осиёи Марказӣ — Русия” ва ҷаласаи Шурои Сарони давлатҳои иштирокдори ИДМ, ки дар Душанбе баргузор гардиданд, дар маркази таваҷҷуҳ қарор гирифтанд”, - таъкид кардааст дафтари матбуоти раисҷумҳур.
Эмомалӣ Раҳмон ва Владимир Путин омодагии худро барои андешидани тадбирҳои муштарак ҷиҳати рушди муносибатҳои шарикии стратегӣ ва ҳампаймонӣ миёни Тоҷикистон ва Русия таъкид намуданд.
Ёдовар мешавем, ки сафари давлатӣ ва кории Владимир Путин ба Душанбе аз 8 то 12 октябр ҷараён гирифт.
Зимнан аз рӯи натиҷаи мулоқоту музокироти сатҳи олии Тоҷикистону Русия 16 санади нави ҳамкорӣ ба имзо расид.