ДУШАНБЕ, 3 окт — Sputnik. Кишвардори Русия Владимир Путин гуфт, бо чунин афрод мисоли Эмомалӣ Раҳмон, ки автомат ба даст вориди Душанбе шуда буд, суҳбат муфиду ҷолиб аст.
Раисҷумҳури Русия изҳор дошт, ки дар қаламрави пасошӯравӣ мусоҳибони ҷолиб зиёданд.
"Барои мисол ҷаноби Раҳмон. Баъди ғасби қудрат аз сӯи исломгароҳои радикалӣ, раисҷумҳури феълии Тоҷикистон ба пойтахти кишвари худ - Душанбе бо силоҳ ба даст ворид шуд", - изҳор дошт Путин.
Вай афзуд, ки айни ҳол Эмомалӣ Раҳмон вазъиятро дар кишвар сохтусоз кардааст, ки он ҳам сода нест.
"Суҳбат бо чунин афрод муфид аст", - таъкид намуд, президенти Русия.
Кишвардори Русия ҳамчунин дар ҳамоиши "Валдай" аз сафари қарибулвуқӯъяш ба Тоҷикистон ва мулоқоташ бо Раҳмон хабар дод.
Раисҷумҳури Русия изҳор дошт, ки нақшаи сафар ба Тоҷикистонро дорад, ки дар онҷо нишасти ИДМ ва ғайра баргузор мешавад.
Владимир Путин рӯзи 9 октябр бо як сафари давлатӣ ба Тоҷикистон меояд.
Дар ҷараёни сафараш ба Тоҷикистон раҳбари Русия дар ҷаласаи Шӯрои сарони кишварҳои узви Иттиҳоди Давлатҳои Мустақил ва Саммити "Русия-Осиёи Марказӣ" ширкат хоҳад кард.